Wafanyabiashara watakiwa kuagiza bidhaa zenye ubora

WATANZANIA wameshauriwa kujenga tabia ya kudai bidhaa zenye ubora toka nje ya nchi, hususan China ili kukomesha uingizwaji wa bidhaa zisizo na viwango.

Rai hiyo imetolewa kutokana na  malalamiko ya muda mrefu kutoka kwa wananchi kuhusu kuzagaa sokoni kwa bidhaa kutoka China zisizokidhi viwango vya ubora.

Mkurugenzi Mtendaji wa Chama cha Wafanyabiashara Wenye Viwanda na Kilimo (TCCIA),

Daniel mchemba

Daniel Machemba, alisema hayo juzi katika mkutano wa maandalizi ya maonyesho ya China Afrika, yanayotarajiwa kuanza kesho katika ukumbi wa Diamond Jubilee, Dar es Salaam.

Machemba aliwataka wafanyabiashara wanaonunua bidhaa kutoka China, wasikubali kutengenezewa bidhaa zisizo na ubora kwa lengo la kujipatia faida kubwa kwa vile kufanya hivyo ni kuwaumiza

watumiaji.

"Tanzania inapaswa kuiga mfano wa nchi za Ulaya, ambazo zimekuwa zikitumia bidhaa kutoka China, lakini zenye viwango vya juu vya ubora kutokana na msimamo wao wa kutotaka zisizo na ubora," alisema.

Alisema biashara kati ya Tanzania na China ni muhimu kwani tangu mwaka 2001, Tanzania imekua ikiuza bidhaa nyingi nchini humo, zikiwemo zisizokubalika sehemu nyingine duniani.

Mwakilishi wa Uchuni na Biashara wa Ubalozi wa China nchini, Wang Fang, akizungumza katika mkutano huo, alisema kwa sasa serikali ya China inafanya kila iwezalo kuhakikisha bidhaa zote zinazoingizwa Tanzania zinakuwa na ubora wa hali ya juu.

Alisema kampuni zitakazoshiriki katika maonyesho hayo ni za kiwango cha juu nchini China, hivyo aliwahakikishia Watanzania ubora wa bidhaa zitakazouzwa mahali hapo kuwa ni wa uhakika.