Wachomwa mishale wakigombea ardhi

WAKAZI wawili wa  kijiji cha Sirorisimba, wilayani Butiama mkoani Mara, wamejeruhiwa kwa kuchomwa mishale, wakati wakigombea ardhi kati yao na wakazi wa kijiji cha Mikomariro wilayani Bunda.

Polisi mjini Bunda imethibitisha  tukio hilo na kuwataja watu hao kuwa ni Hamisi Nyamhanga (38), aliyechomwa mshale mgongoni na Samson Wambura (36), aliyechomwa mshale mguuni, wote wakazi wa kijiji cha Sirorisimba wilayani Butiama.

Mwenyekiti wa kijiji cha Sirorisimba, Alexander Makire, aliliambia matalynewz leo kwamba, tukio hilo lilitokea  juzi asubuhi, baada ya wakazi wa kijiji cha Mikomariro kuvamia shamba la mkazi wa kijiji cha Sirorisimba na kuanza kulima kwa jembe la kukokotwa na ng’ombe.

Makire alisema  baada ya mwenye shamba hilo kuwaona watu hao, alikwenda kuwauliza, lakini badala yake watu hao waliamua kupiga yowe na watu wakakusanyika na kutokea vurugu kubwa, ambapo watu wawili walijeruhiwa kwa kuchomwa mishale.

 Kwa mujibu wa polisi, ambao hawakutaka kutajwa  majina yao, kutokana na vurugu hizo, walifika eneo la tukio wakiwa na uongozi wa wilaya ya Bunda na kuwatia nguvuni watu wawili.

Waliwataja waliokamatwa kuwa ni Tulubeth Tundula (32) na Juma Mwita Werema au Magere Kisheri (45), wote wakazi wa kijiji cha Mikomariro na kwamba wanashikiliwa katika kituo cha polisi Butiama.

Walisema  mtu mmoja aliyejeruhiwa, amelazwa katika hospitali ya mkoa wa Mara mjini Musoma na hali yake inaendelea vizuri na kwamba mwingine hali yake ni nzuri  na  yuko nyumbani.